Nyurat ring Lontar

Nyurat ring Lontar

Sadurung kasurat ring kertas utawi buku-buku, sane dumunan aksara Bali sering kasurat ring lontar-lontar. Sesuratan aksara Bali ring lontar punika kantun becik kawentenannyane kantos makudang-kudang abad. Punika mawinan, kantos mangkin kantun akeh sesuratan-sesuratan aksara Bali ring lontar sane prasida kapanggihin.

1)      Srana Nyurat ring Lontar

Nyurat aksara Bali ring lontar punika mabinayan tekening nyurat aksara Bali ring buku utawi kertas. Punika prasida kacingak mawit saking sarananyane, tetikesnyane kantos sesuratan aksara Balinyane prasida malianan. Sarana sane kaanggen nyurat aksara Bali ring lontar minakadi pangrupak, dulang utawi meja, sumpe, lungka-lungka, tingkih, lan lontar (Rai dkk, 2012:72-76).

1.      Pangrupak, piranti sane utama ri kala nyurat lontar. Pangrupak marupa lemat sane madue rai kekalih. Pangrupak puniki pateh sakadi pulpen utawi pensil ri kala nyurat ring buku.

2.      Dulang utawi meja, kaanggen pinaka taled kapertama ri kala nyurat lontar.

3.      Sumpe, inggih punika piranti sane kaanggen ngiket lontar. Sumpe puniki madue kawigunan mangda lontar sane kasurat nenten mabrarakan taler prasida kaanggen ngawi garisan ring lontar.

4.      Lungka-lungka, inggih punika kasur alit. Kawigunnanyane anggen aled tangan ri kala nyurat lontar.

5.      Tingkih, inggih punika piranti sane kaanggen ngitemin lontar sane sampun kasurat.

6.      Lontar, inggih punika piranti utama sane kaanggen nyurat. Lontar puniki kawigunannyane pateh sakadi kertas.

2)      Tetikes Nyurat Lontar

Ri kala nyurat aksara Bali ring lontar, wenten tetikes sane patut kauratiang, inggih punika tetikes ngambel pangrupak, tetikes ngambel lontar, lan tetikes nyurat (Rai dkk., 2012:77-81).

1.      Tetikes ngambel pangrupak

Sadurung nyurat ring lontar sane kapertama kalaksanayang inggih punika ngambel pangrupak. Tangan sane ngambel pangrupak inggih punika tangan sane tengen, inan lima kagenahang ring kiwa pangrupak, tujuh kagenahang ring duur pangrupak lan linjong kagenahang ring tengen pangrupak. Kimud lan kacing kagenahang ring lontar.

2.      Tetikes ngambel lontar

Tangan sane kiwa madue kawigunan ngambel lontar. Patpat jeriji (tujuh, linjong, kimud lan kacing) kagenahang ring beten lontar. Inan lima kagenahang ring kiwa pangrupak mangda prasida dangan ri kala nyurat.

3.      Tetikes Nyurat

Lontar sane pacang kasurat sampun pastika madaging patpat garis dangsah lan madaging tigang bolong sane wenten ring kiwa, tengah, lan tengen. Ri kala pacang ngawitin nyurat ring lontar, sane patut kauratiang inggih punika bolong lontar sane magenah ring kiwa nuju bolong tengah. Doh bolong kiwa ka bolong tengah punika bawakan yening sandingang teken bolong tengah ka bolong tengen. Nika mawinan, nyurat lontar kakawitin saking bolong kiwa kantos ka bolong tengen. Nanging, sadurung nyurat, ring tengen bolong kiwa, ring kiwa miwah tengen bolong tengah, lan ring kiwa bolong tengen mangda kadagingin garis pinggir pinaka wates sesuratan mangda sesuratannyane becik. Sane kapertama kasurat inggih punika pamahbah sesuratan sane kekawitin panti utawi pamada sane kalanturang ngangge Mulastawa inggih punika “Om Awighnamastu” salanturnyane kasurat malih ngangge pamahbah.

Nyurat aksara Bali ring lontar mabinayan tekening nyurat aksara Bali ring kertas. Ri kala nyurat aksara Bali ring lontar, nyurat wangun aksaranyane sumangdane pegat-pegat mangda lontar sane kasurat nenten bolong utawi usak (Antara, 2009:4). Ri kala nyurat kaaptiang mangda wangun aksara Bali sane kasurat mamatan titiran utawi ngawindhu. Ageng aksarane taler spasinnyane mangda pateh. Yening iwang ri kala nyurat, sampunang aksara punika kaurek utawi kacoret. Aksara sane iwang punika kapademang antuk nagingin ulu lan suku (Tinggen, 2004:3). Tetujonnyane, mangda aksara sane sampun kadagingin antuk ulu lan suku nenten malih kawacen. Imbanyane, ri kala pacang nyurat ‘buku’, nanging kasurat   bu kø,  ¿ (buki), punika prasida kauwah dados  bu kø u ku.   (buku).